Tit 1 | MMX | STEP | Nenia ne Pol, lasaxaruki at ne Moroa la nenia laradi vavang at ne Iesu Karisito. Nenia a gugu rik lox alolos lunuunu at lavaanat soxolik at ne Moroa. Nia a vanasa nom limixin mi levelinga ruturun at ne Moroa xusu lorooro atdi nak mokso aleng,

Titus 1

Lavapaase Axasep

1 Nenia ne Pol, lasaxaruki at ne Moroa la nenia laradi vavang at ne Iesu Karisito. Nenia a gugu rik lox alolos lunuunu at lavaanat soxolik at ne Moroa. Nia a vanasa nom limixin mi levelinga ruturun at ne Moroa xusu lorooro atdi nak mokso aleng, 2 la dinam doma voovo ri lorooro avolo. Na lorooro avolo ne Moroa ga tong alii i ganoxa at lereot. La levelinga ren i ruturun tinotno, neni xopmen laradi xaxarang. 3 La neni ga malagan katling na levenaleng kusu neni na lox asuvos na levelinga mumu lorooro avolo ri limixin; la neni ga soxolik ka ia xusu nenia ana tong asu nom levelinga ren. Neni ne Moroa la neni Laradi Loklox Arooro atnedik.

4 Nenia a malagan na levelinga ru ne Taitas, nenu u lok ngan ne nuruk tino, mila nenu u nuunu at ne Iesu Karisito xerekngan ia.

Letaba nabalamu mi lenmila tu boro at ne Moroa ne Temen dik eburu mi ne Iesu Karisito, Laradi Loklox Arooro atnedik.

Lugugu At Ne Taitas Ro At Losoxan Krit

5 Nenia aga lok li u, ne Taitas, to Krit la aga on basinge u. Lavasuun teren keretna; leventaba leven gugu at lotu ro Krit kovisi na sixit avukat. La a vara i do una gugu axap nom levempanga nenia goxo epovo na gu axav i. Una soxolik ka tuvuttadi amgomgo ri lox ase limixin at laraugu lotu keneng at levenmenemen getgesara. Una lox i na, kerekngan nia aga tong i ru gano. 6 Loklok ap mo luvuttadi mukun na lok nunuan la nedi getgesara dina epot ka leges atkin mun, la laxamdak mi laxaalik atdi dina nuunu at ne Iesu, la loklok atdi nak mokso aleng kusu limixin petpes noxo epovo na tong i do nom laxamdak mi laxaalik di lok amisik laxakapmek, la kopmen dinang tonga res.

7 Nedi nom luvuttadi amgomgo dina lok tatao lugugu at ne Moroa maxeneng at lotu ren; kuren la lorooro atdi nak mokso aleng at lemeren limixin. Di noxo paase xuxurung. Nemen di tak musak soso, di noxo inin tangtangku mi lengkadan lolos. Nemen di ta vesep. Nemen di ta vavara pilas solo. 8 Ketla nedi dina lok maraose mi limixin boro vetpes; dina mumu asu loklok i nunuan ti lok tooro limixin; lodoxoma atdi na lox avukat mun; dina mumu asu loklok i nunuan; loklok atdi xopmen taxakapmek teren; la di epovo ri lok tatao avukat luruptuvuk atdi at lempanga ua xopmen na lox avukat. 9 Nedi dinam tebeng lolos levelinga ruturun at ne Iesu xerekngan nia aga lox ase vam di min. Dina nemen kuren kusu dina lox alolos lunuunu at limixin mi levelinga ik mokso, la kusu dina lox akmokso lodoxoma atnedi limixin nuunu di xopara levelinga at ne Iesu.

10 Una soxolik ka nedi, loklok atnedi ik mokso xerepmo; kusu dina sep pepe buaang nedi limixin nuunu ro Krit ding tonga xepe levelinga ruturun. Mo limixin di paase gamasa mun la di babala arup limixin. Nedi limixin me Judaia, mo dim tebeng alolos levelinga at ne Moses. 11 Una sep pepe di xusu di noxo vaase bok ba ro xeneng at laraugu lotu, mila dik lox ase limixin mi levelinga xopmen nak mokso la kerepmo dik lok kapmek lunuunu at limixin la dik lok kapmek bok lixitkis koetemen. Di lox i xerepmo xusu dina lok kaka levempilas la na loklok atdi i lok kapmek tinotno.

12 Lara leeme vapaase me go Krit ga lok keretna, “Limixin me Krit nedi limixin kaxarang, loklok atdi i lok kapmek ngan lababo sio la nedi dik molo at lugugu la di xoxo anan amisik.” 13 Na levelinga ren i ruturun. Kuren la una vaase sok di, kusu dina tu lolos at lunuunu atdi. 14 Una paase lolos bok tidi xusu di noxo mumu asu leventetere at lubungmixin me Judaia; la kusu di noxo mu asu levelinga atnedi ding tonga aie levelinga at ne Moroa. 15 Di lok do leventaba leveluxa i xaala; ketla i lox avukat do limixin nuunu dina anan leveluxa axap; nedi limixin kakapmek kopmen dina nuunu at ne Iesu Karisito la di ke xepe leventaba leveluxa mila lodoxoma atdi xopmen na lox avukat la loklok atdi i lok bilinga. 16 Di tong i do di nuunu at ne Moroa, ketla kopmen na ruturun; mila levempanga nunuan kopmen na ravasu at lorooro atdi. Loklok atdi i lok kapmek at lemeren ne Moroa la at lemeren limixin. Nedi limixin tongtonga xepe mun, la dixo epovo na lok tevempanga i nunuan.